（09）＂谷＂的迷思
揀間谷定唔谷嘅學校好呢？
（一）首先何謂谷？
（二）區內大熱一線，係唔係好谷？
（三）46／48 邊間唔＂谷＂？
（四）人哋話果間唔谷，就適合你小朋友嗎？
------------------------
＂谷＂的迷思（一／四）
首先何謂谷？
一般解讀：
- 測考默多，範圍廣。
- 功課多，抄寫多，思考多，操練多。
- 教得深，教得快。
- 補充練習多。
- 教淺考深。
- 對成績要求高。
- 要求父母多了解，多参與，多跟進。
*記住，有學術要求，並不代表不能愉快學習，小朋友愉唔愉快，其實好睇家長。*
學校谷定唔名谷，其實都是相對的，小朋友承受到的，會覺得唔算太谷，小朋友追得辛苦、吃力的，可能就是不太適合了。
*不過要留意，很多時谷的不是學校，而是家長！* 當小朋友的成績令家長覺得丟臉或未能為家長添上光釆時，家長催谷就好可能不其然地發生。
學期評估會番兜，有計平時分，無公布名次，每班每科都有學科奬，這些都會令家長長時間有壓力，不自覺地谷小朋友的。
家長要清醒配合，才不會掉進自谷陷阱。
選到合程度嘅學校，配合到小朋友學習嘅步伐，返學就好似私補一樣，跟著你進度去學與教，小朋友學習如魚得水；如果需要依賴補習去追上學校進度，其實已經不太健康，小朋友休息及娛樂時間亦減少了，事倍功半。如果補助後仍大落後，好可能已經是錯配了。都係果句，沒有最好，只有最適合。
------------------------
＂谷＂的迷思（二／四）
區內大熱一線，係唔係好谷？
谷定唔谷，有時都好個人同睇家長點睇，例如測考評估無名次，只有學期每科每班頭三獎勵，有些家長會覺得輕鬆，唔谷，但另一角度睇，就係無名次，小朋友又無攞獎，唔知級中位置，唔知banding，家長唯有分分皆辛苦，一分都不能少，唯有無止境的自谷。如果再加上有計平時分，真係全年處於作戰狀態，壓力不少，唔覺得谷才怪！
又例如功課多，每日十幾樣，普遍都會覺得多，加理自己買嘅補充練習，加埋預習、溫書，再加埋補習同興趣班，真係瞓都唔夠，莫說有得玩！但有些家長，又會覺得用個半至兩小時完成果十幾樣功課，已經等如每天溫了習，不用自加補充，不用再溫習，放學後還可參加興趣班，做完功課吃飯，飯後就自由時間，十幾樣功課，配合得好，一D都唔覺谷。
所以谷定唔谷，除咗學校，其實都好睇小朋友程度、能力和時間安排，同埋家長對小朋友的期望。
------------------------
＂谷＂的迷思（三／四）
46／48 邊間唔＂谷＂
要從一般官津，找一間唔＂谷＂的開心學校，其實好似真係有D難度，好彩46/48起碼仲有SK2同慈敬，佢地行新派直資果套，小一無測考，不過，如果小朋友能力及程度配合，間間都可以係你想的理想學校。
如果以幾間大熱一線計，個人覺得聖馬太對家長投入需求相對比較大，要求家長跟進小朋友學習進度的時間可能比較多；德兆課程比較深，同學間的比較亦加添少許壓力；藍循測考範圍大，多計平時分，令小朋友全學期備戰，一分都不能少；平兆則出名功課不少。
最容易令人誤會，我覺得就係油基顯同油基法，好多人都話油基顯同油基法無聖馬太同雙兆咁＂谷＂，不過如果覺得聖馬太同雙兆係＂谷＂，千萬不要以為油基顯同油基法係唔＂谷＂！更加唔好將油顯油法嘅＂輕鬆＂去同宣基二慈敬果D去比。好多例子，就係同期望嘅落差太大，造成錯配。
好多人話想揀二線，冇咁＂谷＂！
其實部分想上位的二線，對小朋友的學術要求都不少，可能比四大熱門更甚，學校想有更好的升中成績，設精英班，有時可能未顧及小朋友的能力及程度地教深教快，再配合機械式操練，都會令小朋友及家長覺得被催谷，當然這樣對提升升中成績會有一定的效果，所以較為注重升中成績嘅：愛德華、聖安當、秀明、陳呂等，其實未必係可以好輕鬆應付。
除SK2、慈敬同堅二外，我估都有仲幾間三線不太追求升中成績，相信九龍灣基樂的初小是其中之一，其餘的三線，都應該係以關愛、補底為主打，相對壓力應該少一點。
因應小朋友的程度、能力與及家長的期望，找適合的學校，作出合適的配對，我相信＂谷＂的問題自然迎刃而解。小一選校，沒有最好，只有最適合，祝大家找到心儀而又適合的小學。
------------------------------
＂谷＂的迷思（四／四）
經常聽到家長評論邊間學校谷（但好多時講嘅都唔係當校家長！)，邊間冇咁谷！點解大熱一線就一定好谷？二線就係無咁谷？人哋話果間唔谷，就適合你小朋友嗎？
我覺得程度和能力不及，無論在一線定二線，就間間都會覺得谷。選到合程度嘅學校，配合到小朋友學習嘅步伐，相信可以避免咗＂谷＂嘅問題。
谷定唔谷，除咗學校，其實都好睇小朋友程度、能力和時間安排，同埋家長對小朋友的期望。
家長們，與其研究邊間學校谷定唔谷，不如先了解自己小朋友的程度和能力，是否適合該校的程度和教學模式。適合的配對，相信就沒有所謂谷與唔谷。
*不過要留意，很多時谷的不是學校，而是家長！*
都係果句，沒有最好，只有最適合。
