木門對木門

木門對木門

就當幼稚園畢業都分三個組别，又當小學又分三個組别。

第一組學生，入學術型學校(一般升中有近40%以上 band 1)，相信不難適。但如果入第二、三組別學校，則有機會因課程大容易，無挑戰性，在無競爭無突破的情況下浪費了天賦。

第二組學生入第一組學校，相信一般會留守於中游位置。個别因發展先後的同學假以時日可能可以追及課程，但亦有同學可能太吃力而失去學習興趣。相信 第二組學生 入讀第二組别學校(近30%b1)會較為適合，學校程度配合，無須靠補習追趕課程，自己努力一點，應該可以保持較前名次，升讀第一組別中學。

第三組别同學，如勉強選擇第一組別學校或部份第二組別學校，後果可能會好嚴重，長期處於追趕課程的狀態，放棄玩樂時間，吃力温習亦未能取得理想成績，久而久之就會失去學習興趣，最多睇三個學期，如果保持級尾十而且無心機返學，就應該懸崖勒馬，於二年級下學期開始重新選校，四、五月開始寄信轉校。

當然個個小朋友發展快慢不同，有D小朋友今日好似第三組，過多一年半載或者會變第二組，再到小五、小六又可能變第一組，大家都唔會知。

不過我覺得如果今日係第三組，最好唔好揀D學術要求高嘅小學，有D學校如宣基二、九基樂，佢哋係伸延幼小銜接期，等埋發展慢少少嘅小朋友，到高小先一齊衝，一樣有機會成為b1學生，升讀心儀英中。

相反，如果一心諗住happy到尾嘅，就避免選這類(初小合皮，高小會飛)，好多人以為九基樂好happy，到小四就呱呱叫。

46/48 Simon

（09）排名

其實排名嘅嘢，真係好睇家長心水，有人著重學業成績，有人睇設施、教師質素、校風等，鍾意又可以計埋體藝成績、甚至教學方式、硬件配套等；排中學又有人覺得排入U率，有人覺得要排入八大，又可以排33222，又可以排5**率⋯⋯

所以坊間排名，多具爭議，因人人把尺都唔同，部分評分亦有主觀成份，而各範疇比重比例亦未必迎合每個人的口味。

網上D排名⋯⋯唉！

平兆、德兆、聖馬太

平兆、德兆、聖馬太三間係48升中成績最好，都是學術要求高的學校。如果小朋友能專心，喜歡學習，喜歡看書，不討厭做功課，我相信基本上都能適應。如果家長係會跟貼小朋友的測考默及功課，相信聖馬太會花家長最多時間及心力。

至於平、德兆，個人覺得德兆比較進取，對外比賽獎項亦較多，相對比較注重比賽名聲，之前聖公會小學奧數比賽德兆亦入三甲，有能力與拔箤、SPCC等名校一較高下。德兆教得深，不過無教快，考試亦比較深。小朋友的成績/成就亦會公佈，在校門口會公佈每班每科頭三名。

平兆則比較注重學業多於體藝比賽成績，升中b1 rate亦比較高，2014年約64% b1學生，以無聯係直屬中學嘅津校嚟計，全港應該無10間小學有咁好成績，校隊多在小四才加入，對成績好的同學亦比較低調，同學得校內獎或全班名次都不會公佈，只有學生自己知，就算你年年考級六至十名都唔會有人知。只有全年級頭五名因會上台領獎而被公開。在校外你亦都唔會知邊個係風紀同班長。

雙兆其實很多方面都差不多，我個人覺得平兆比較低調，適合比較純樸嘅小朋友，而德兆較為進取，適合鬥心比較強的小朋友。

我估以上都是適合一些學術型小朋友，學術水平中上丶能專注學習、而家長並非想要happy school如港同、救恩或宣基坪石那類，家長對小朋友有成績上的期望，並能配合學校跟進小朋友進度，進行家校合作，如果小朋友（及家長）能適應，無需靠補習追趕學校課程進度，相信小朋友不單根基打得好，而且升中派位亦可以有不錯的成績。

最緊要都係果句，小一選校，沒有最好的，要找最適合的。

46/48 Simon

（08）甲二三、乙二三

（08）甲二三、乙二三

//甲二、三是否要填//

1）基本上大熱一線填甲二、三係唔會中，可以填嚟當誠意分叩門用，留意真係大熱先好咁填。雖然甲二、三誠意有限，但總好過無，而且見過有學校叩門條件係要填過首三位。

2）填間入咗你唔會後悔的次熱或二線，記住甲部入咗，就唔會同你抽乙部。

3）如果你唔諗住叩門，可以留空。不過我覺得無留空嘅必要，填定到時叩又得唔叩又得。

4）有人話唔好填甲二、三，咁會快人一步抽乙一⋯⋯千萬唔好信，一定係等全部完成甲部先開始乙部，如果唔係，你諗下唔填甲部咪好著數。

//乙二、三填大熱當誠意分叩門用//

我覺得無必要，反而浪費了乙二、三個位。填得乙二，已經不是最愛，誠意分已經大打折扣，另外如果中乙二，都係叩1-1-1 加幾間心儀一線，浪費乙二、三個位，跌落去中三、四線，叩門分分鐘要叩一、二線共十幾二十間學校！

//甲一二三 。 乙一二三

仲有，唔好甲一二三 同 乙一二三填相同學校。甲二乙二填大熱，會浪費乙二個位。甲二乙二填冷門，入咗甲二無得抽乙一。

46/48 Simon

（04）46/48 有乜選擇

46/48 究竟有乜學校選擇

從學術要求程度可分三大類：

1）傳統學術進取形

學術程度和要求比較高，要求可以坐定定專心上課的，要預算約兩小時做功課，測考默要認真溫習。多數一線及想升呢的二線都屬於這類。留意很多傳統形學校都會加入活動教學嘅元素，不代表傳統就不能愉快學習。

2）傳統程度調適形

基本上都是傳統教學，但課程比較淺，學術要求低少少，功課量亦相對輕少少，小朋友的學習壓力亦低少少，雖然如此，但不一定是可以很輕鬆應付的。相對升中成績亦會差少少。部分二、三線都屬於這類。

3）新派愉快減壓形

主張快樂學習，不追求亮麗升中成績，學校多以關愛為主打，學習壓力相對比較細，部分更推行類似新派直資的愉快學習無測考政策。

正所謂百貨應百客，家家的孩子都不同，最緊要目標清晰，自行對號入座，切忌又要馬兒好，又要馬兒不吃草，家長千萬不要單單以*「名氣、口碑、升中成績、中奬機會」*作為選校重要依據。

選了學術型學校，反過來又經常埋怨學校測考默功課多，這樣孩子就會無所適從，難以適應。

之後發現如有錯配，必須及早處理，不要為了面子，輸了孩子，總有適合的，免得白白痛苦六年，影響日後成長及親子關係。

*選校還是適合最重要，要平衡社會的要求與子女的發展步伐，亦要協調子女的需要及家長的期望。*

46/48 Simon

大B 細B

大B 細B

十一月細B應否repeat K3 以考小一？

我覺得，十至十二月細B，如果沒有學習上的問題，基本上都不用刻意 repert。但為考直私，普遍來說大B又的確會有一點優勢。如果現在比我揀，我寧願玩多一年才讀K1。不過，知易行難！

如果跟到，我不會為考直私而repeat，對小朋友心理可能有壞影響。

如果跟唔到，repeat絕對有幫助，小朋友接收力和理解力都強了，升小適應也容易些，自信心也大些。

基本上如果係細B，可以的話，應該遲一年才入學，根本不用急，到小三大細B的分別才開始收窄，如果做細B，白白苦了起碼六年！試想想如果遲一年才入學，嗰六年小朋友會輕鬆幾多，理解力又好D，吸收力又好D，自信心又好D，各項表現都理想D。所以細B，越早轉做大B越好。根本就百利而無一害。

Handle到冇乜必要做大B，同意，但就係有個risk，要handle到，handle唔到點算，到時先諗就要考慮多好好嘢，到老師同你講跟唔到，已經好遲了，你到時仲頭痕！何不一早轉定做大B，百利而無一害，往後日子年年充滿自信。

如果說會浪費一年時間，不如說賺多一年愉快無憂的玩樂時間，同埋賺咗考到直私嘅機會，同埋賺咗可以一路維持到起碼小三嘅自信心。所以，如果可以，跟本就應該遲一年才返學，做大B跟本冇蝕底。

一早轉做b ,百利而無一害，賺咗嘅開心快樂時光，同埋賺咗考到直私嘅機會，同埋賺咗可以一路維持到起碼小三嘅自信心，我就覺得一啲都唔浪費。

46/48 Simon

（05）膚淺官津選校建議

（05）膚淺官津選校建議

膚淺官津選校建議（一）

學術程度頭中尾三分法

註：講明呢個係膚淺嘅方法，認真就緊係要睇＂小一選校三步曲＂、＂點先叫適合＂同＂選校心得＂，再作詳細配對。

選直私著重睇教學模式，選官津，都係無乜幾多唔同嘅教學模式選擇，唯有睇程度，同一套課程，有學校教得深D，有學校教得淺D，大約可以喺升中成績反映出嚟！某程度上，唔同嘅升中成績，都可以睇到少少唔同嘅教學模式。

首先估下自己小朋友在幼稚園班中算是頭、中定尾果批，再估下佢去到講求紀律嘅小學時，每天要坐定定聽書，做一小時功課，加少少溫習，到考試時佢又會係頭、中定尾果批。

覺得佢係頭果批嘅，大可嘗試選擇區內一線官津。覺得都係五五波或中間果批，就了解多D二線學校，記得二線唔代表輕鬆，二線有兩類，想上位的二線學校，可能對家長及小朋友的要求更甚於一線。中游份子仲可以考慮埋做一線中間果浸定二線頭果浸。

相信甚少家長會覺得自己小朋友係尾果批，但如果你真係意識到你的小朋友，在傳統學術學校上，追趕成績會比較吃力的，不妨多了解一些主打補底、關愛的三線學校。間間學校都有band 1學生，小學打好基礎，建立信心，假以時日，相信可以大器晚成。總好過勉強追趕一線學校的課程，打撃信心，對學習失去興趣，變成＂讀唔到書＂的一群。

膚淺官津選校建議（二）

之前的膚淺官津選校建議，主要以學術水平分頭中尾去選一二三線小學。今次介紹另一膚淺選校建議，以小朋友的程度和性格去配合學校之學術水平及要求。

同上次一樣，講明呢個係膚淺嘅方法，認真就緊係要睇＂小一選校三步曲＂、＂點先叫適合＂同＂選校心得＂，再作詳細配對。

某程度上，單從升中成績，已經可以推斷：

1）學校的學術程度，

2）教學模式，

3）學校對小朋友和家長之要求。

自我評估一下自己小朋友，學術程度及行為(操行)是否能滿足學校要求之水平而作出選擇。

第一類

學術程度和要求比較高，要求可以坐定定專心上課的，要預算約兩小時做功課，測考默要認真溫習。多數一線大熱及想升呢的二線都屬於這類。

覺得自己小朋友學術水平中上丶能專注學習、家長對小朋友有成績上的期望，並能配合學校跟進小朋友進度，無需靠補習追趕學校課程進度，可以此類學校為目標。

第二類

基本上都是傳統教學，但課程可能教得比較淺，學術要求低少少，功課量亦相對輕少少，小朋友的學習壓力亦低少少，雖然如此，但不一定是可以很輕鬆應付的，每天功課都可能要用上約一小時多。而相對升中成績亦可能會差少少。部分二、三線都屬於這類。

如果覺得小朋友都係五五波或中間果批，考慮與其做一線尾果浸不如做二線頭果浸；或家長又未必有時間跟帖子女功課，可能可以退一步海濶天空，成功保持二線b1優勢，升讀心儀中學。

第三類

主張快樂學習，不追求亮麗升中成績，學校多以關愛為主打，學習壓力相對比較細，部分更推行類似新派直資的愉快學習無測考政策。通常此類學校，不會標榜學業成績，反以小朋友欣賞自己之長處出發，行行出狀元，建立小朋友的信心及價值。

如小朋友屬於學術中丶下游，又希望有快樂童年，唔想有壓力追趕課程進度；又或家長期望關愛為主，少功課為妙，對學業成績無要求；又比如說小朋友極度活躍，不能專注坐定，未能適應傳統學與教模式；咁可能可以多了解此類學校。

選好學校，自行、甲一、乙一，從一而終，減少煩惱。最後最緊要都係果句，小一選校，沒有最好的，要找最適合的。

46/48 Simon