（07）自行選校
自行填表，點樣考慮最心儀、最高分同 1-1-1 呢！
準備填表自行選校，揀定心水未？開始多D留意下小朋友屬於邊類型，適合乜野學校。不過講真，官津嚟計，都無乜大唔同嘅教學模式比你揀！
填自行要諗乜？最基本當然首先係睇適唔適合小朋友，學校點先叫適合之前詳細講咗，最重要係：
1）以小朋友性格、能力、興趣去配合學校嘅程度和教學模式；
2）及家長是否認同學校理念，學校又是否符合家長嘅期望；
3）再考慮升中成績、遠近、設施、經濟、校風等其他因素。
今次主要講填表策略。當諗緊嘅幾間學校都叫適合，咁又點揀呢？
相信主要都係考慮呢幾個情況：
1）有間區外最鐘意
2）有間區內最鐘意
3）有間最大機會/最高分
4）又要預備1-1-1叩門
1）區外最鐘意
隨非你有25分（有D學校25分都危危地），如果唔係都真係要考慮清楚，因為自行揀咗跨區而又唔中，就無得1-1-1叩門。同埋就算中，要跨區返學，真係要諗清楚。
**不要少看這1-1-1的威力，相信大熱七校中，成功叩門的十個有七個都是1-1-1的。餘下的三個，可能都是有秘密武器的⋯⋯識飛或者識人。**
2）區內最鐘意
自選填區內最鐘意係最正路，由其是你只有15分，填邊間大熱都無大機會，不如一心一意選最心儀的做1-1-1就好了。
3）最大機會/最高分（但不是最鐘意）
呢個情況最煩，有20分或以上，但又唔係自己最鐘意，又或者得15分，係咪求其搵間校齡淺+無宗教嘅搏一搏，希望一鳥在手，勝過百鳥在林，中咗再叩最愛都易D？
a）一鳥在手，再叩最愛
呢個要諗清楚，第一，中咗再叩最愛，首先會無咗1-1-1，係咪咁易叩到？第二，唔中咁點先，又無咗1-1-1去叩最愛，能入讀最愛嘅機會又細咗！
b）放棄最愛
不過，如果呢間大機會／高分嘅學校，你唔係咁討厭，入到後就算叩唔到最愛都唔緊要嘅，我都會建議填呢間，中就讀，唔中1-1-1叩得番呢間機會都大少少。至於最愛⋯⋯就當有緣無份吧！
c）唔要高chance，非最愛不選
當然，人各有志，如果你對至愛非君不嫁，又覺得自己運氣不差，又覺得自己小朋友能以一敵百，大可放棄必中二奶嘅機會。
4）預備1-1-1叩門
千萬不要為叩門機會，掉轉唔選心儀學校，如果你心儀聖安當，但係愛德華話要1-1-1叩門而聖安當唔洗，咁你會唔會揀愛德華唔揀聖安多呢？所以根本不用比較那間要1-1-1，那間不用。
我覺得是否需要1-1-1叩門不是選校考慮因素，而當選定心儀學校，就應該以1-1-1去填表，以增加中選機會。
46/48 Simon
