（10）叩門 ~ 應該於自行填表前已計劃好 1-1-1 的選擇

（10）叩門 ~ 應該於自行填表前已計劃好 1-1-1 的選擇

好多家長對自己小朋友充滿信心，都會咁計劃：

諗住如果運氣不好，自行唔得，抽獎唔中，預咗都會靠實力去叩門。

咁諗其實都好正常，不過話比你知，叩門都不是只看實力，運氣及誠意都非常重要，而且，有實力的也多的是。

會唔會考慮下，當填選自行/統一時，就應該計劃一下，避免令自己處於一個超級下風位，更加千其唔好諗住自己小朋友夠叻，無視1-1-1的威力。

要知道開心叩門同沈重壓力下叩門，是差天共地的，試想想：

（中乙二，叩1-1-1 加幾間心儀一線）vs 

（中三、四線，叩一、二線共十幾二十間）

叩門，肯定不是一件輕鬆愉快及容易的事，由其是當你的派位遠超越你的想像時，當中的苦，實非筆墨所能形容。

//是否大部分學校真是看成績，多於看誠意1-1-1？//

不要小看1-1-1的威力

雖然講到明只收1-1-1叩門的，48就只有藍循，但其他學校1-1-1會加分亦相信係事實，除非你真係覺得自己小朋友非常之出類拔萃，能人所不能，否則不要看輕1-1-1的威力，依家個個小朋友都咁叻，當有兩個差不多的小朋友，學校一定揀1-1-1果個，避免遇到騎牛搵馬的學生，因此而增加學校行政工作。

叩門大熱官津，我覺得成績超哂班都未必一定好有優勢，學校評測學術水平好可能只去到一個點，你懂得再深的都可能無用武之地。

叩門大熱學校，成功的相信九成係1-1-1，剩低果幾個，相信一係識飛，一係識人！如果你1-1-1果間唔得，叩其他熱門一線相信機會都相對較微，除非面試表現突然真係超哂班或有神秘武器－人際網絡。

//0-0-0 一定無機？//

咁又唔一定，就算藍循，有時都會聽到唔係1-1-1，甚至0-0-0有得見，但要知道，人地點解無1-1-1。

學校一般都會比機會區外叩門，1-1-0就充份顯示誠意，但有些因自行時已經保險地選擇了有高分學校而又中了，或一些註冊了直資因而沒機會抽奬的，相信學校也可能是因應制度而體諒家長，而給予這些0-0-0的家長一個機會。

所以我覺得，要避免惨烈式叩門，先要從填表開始計劃，其次千其唔好諗住自己小朋友夠叻，覺得叩門只講實力而無視1-1-1的威力，而 1-1-1 都係留比自己真心真意嘅首選比較恰當。

46/48 Simon